טייערע ברודער, אחינו בני ישראל, רחמנים ובני רחמנים נדיבי לב הי"ו

אין די יעצטיגע טעג וואס מיר זענען געזיצן אינאיינעם, און געקלאגט און געטרויערט אויפן חורבן בית המקדש, על חורבן ביתך כי הוחרב פעמיים, זיצט א חשובע משפחה און טרויערט און קלאגט אויפן זייער אייגענע חורבן הבית...

ווי באקאנט איז פארגעקומען דעם פארלאפענעם פרייטאג פרשת דברים, א גרויסע שטורעם אין קרית טאהש און אין די אומגעגענט.

די 'האריקען' האט נישט אפגעשוינט פולע אידישע הייזער, און צווישן זיי די שפאגל נייע דירה פון אונזער א ידיד, א גאר חשובער און געהויבענע אינגערמאן הי"ו, וועלכע ער מיט זיין חשובער בני המשפחה האבן זיך אריינגעצויגן אין די נייע דירה בלויז עטליכע חדשים צוריק!!

לאמיר אריינטראכן א מינוט:

דער חשובער אינגערמאן וועלכע ארבייט שווער על המחיה ועל הכלכלה, צו שפייזן זיין געזונדל מיט די אכט קינדערלעך בליעה"ר, האט לאנגע יארן געוואוינט אין א פיצקעלע דירה, און האט מיט גרויס מיה און פלאג אפגעקויפט זיין אייגענעם דירה, כדי צו קענען פלאצירן די טייערע קינדערלעך און זיי מגדל זיין מיט הרחבת הדעת.

אסאך אסאך כוחות, מיה, פלאג און געלט איז אריינגעלייגט געווארן אהער צושטעלן די דירה און אלע אירע געברויכן, און בשעה טובה זיך אריינגעצויגן דערין מיט גרויס פריידט, מיט האפענונג און ארויסקוקענדיג אויף הרחבת הדעת פאר זיך, די ב"ב, און קינדערלעך...

דאן איז אנגעקומען די 'מים הזידונים' וואס האט פארפלייצט און פארשוועמט אלעס וואס איז געשטאנען אין וועג, מיטנעמענ'דיג מיט זיך און חרוב געמאכט אלעס אלעס וואס האט זיך געפונען אויפן ערשטן שטאק, אלע חפיצים און כלים, בעטן, קליידער, מאשינען, די פלאר און ווענט אא"וו, אלעס איז חרוב ונחרב, און א מצב וואס מען קען דארט נישט וואוינען אזוי.

אבער 'מים רבים לא יכלו לכבות את אהבה'... טייערע אידישע קינדער, וועלן נישט לאזן פאלן א אנדערע איד!!! און וועלן אנקעגן קומען בעת צר צו שטעלן אויף די פיס די חשובע משפחה.

מיר לאזן דא אין גאנג א קאמפיין לטובת די חשובע משפחה, כדי מען זאל זיך קענען נעמען צו די ארבייט גאר אינגיכן, איבערצובויען די דירה פון פריש, און די משפחה זאל זיך קענען אריינציען צוריק צו זייער דירה אין די נאנטע טעג.

די שווערע שאדענ'ס און די איבערבוי פון די דירה ווערט געשאצט צו קאסטן אריבער $70.000 וואס בערך $20,000 ווערט באצאלט דורך די אינשורענס פירמע.

און די איבריגע $50,000 וועט אי"ה צוזאם געשטעלט ווערן דורך טייערע אידישע ברודער, וועלכע וועלן מיט הארץ און געפיל ארויסהעלפן א חשובע משפחה צוריק גיין צו זייער אייגן הויז...!!!

בזכות די גרויסע מצוה וועלן מיר אלע בקרוב צוריק גיין צו אונזער הויז, בבנין בית המקדש בקרוב ממש און מיר וועלן זוכה זיין ותחזנה עינינו בשובך לציון ברחמים בקרוב בימינו אמן.